Direktor Edilse Goeloe di Fundashon Kuido pa Personanan Desabilitá (FKPD) a hasi traspaso di un kushina nobo nobo na Grupo Kuido I Bienestar (ZWG). E dos partidonan a firma un Memorandum of Understanding (MoU) pa esaki djaweps 14 di mart. Despues Genara Silberie, direktor di ZWG, a haña e yabinan di e kushina. ZWG ta spera ku for di 22 di aprel 2024 e lo por kushiná reim 500 kuminda pa su klientenan i kliente di FKPD.
A renobá e edifisio di FKPD na Rincon. Ministerio di Salubridat Públiko, Bienestar i Deporte (VWS), a finansiá e renobashon akí. Den e edifisio semper tabatin un kushina. Klientenan tabata kushiná bou di guia di un kòki kuminda i prepará snèk. Parti di esei tabata pa benta. Ku e ganashi tabata organisá aktividat pa e klientenan. Delaster tres aña e kushina no tabata na uso mas.
Debí na enbehesimentu na Boneiru, ZWG a haña un oumento di kliente ku mester di kuminda kayente. Por ehèmpel pa e programa di ‘Tafeltje dek je.’ (Drecha mesa). ZWG tabatin un tempu kaba nesesidat di un kushina amplio pa prepará kuminda pa su klientenan. Un parti di e klientenan di FKPD ta kai bou di kliente di ZWG. Debí na esaki tabata fásil pa e dos direktornan traha huntu.
,,E koperashon ku ZWG tabata úniko i a benefisiá e dos organisashonnan masha. Ta posibel pa bo amplia bo horizonte komo organisashon. I bai en buska di un sosio ku realmente por nifiká algu pa FKPD i su klientenan,” asina Goeloe ta splika. ,,Nos tabata masha lihé di akuerdo ku otro i konvensí ku e forma akí di traha ta bon pa nos tur dos. P’esei nos a pidi huntu sèn na VWS, anto nos a hañ’é tambe,” asina Silberie ta remarká.
Den e kushina nobo tin tres kòki di ZWG ku ta bai traha pa prepará e kumindanan. E kòkinan a haña un entrenamentu kon ora di kushiná nan por tene kuenta ku por ehèmpel kliente di FKPD ku tin problema pa guli. Te awor tin un kliente di FKPD ku ta yuda e kòkinan. Despues di un tempu e dos organisashonnan ta bai wak si meskos ku ántes algun kliente di FKPD por yuda den kushina.
