Fundashon Kuido pa Personanan Desabilitá (FKPD) ta lansa un wèpsait nobo ku informashon tokante e fundashon i su servisionan, www.fkpd.org. Awor ku tin e wèpsait akí, ta mas fásil pa aserká FKPD online i e organisashon ta mas visibel. E wèpsait ta ful na papiamentu i hulandes, e tin un diseño moderno i ta brinda oportunidat pa kontakto direkto. Riba e wèpsait tin hopi informashon tokante FKPD, entre otro e oferta di kuido, notisia i vakatura, pero tambe publikashon, adrès, i algu di historia.
“Nos fundashon ta kresiendo enormemente i ku esei e nesesidat pa un wèpsait profeshonal a oumentá. Awor ku nos a logra e wèpsait, nos ta ansioso pa nos ta mas aksesibel i alkansá mas hende ku un desabilidat i ofresé nan kuido. Nan ta forma un parti grandi, kresiente i en partikular un parti hopi importante di nos komunidat i FKPD tei spesial pa nan. Nos ta usa e wèpsait pa presentá desaroyo importante na públiko, trese momento leuk ku nos klientenan bou di atenshon i kompartí informashon ofisial. FKPD ta orguyoso ku e logro importante akí. I nos ta invitá tur hende pa bishitá nos wèpsait.” Asina direktor Edilse Goeloe ta bisa.
FKPD ta ofresé mas ku kuarenta aña kuido na midí na persona ku desabilidat(nan) serebral i/òf físiko na Boneiru. E fundashon ta brinda kliente un neishi kaluroso kaminda ta trata nan ku rèspèt i amor. Di e forma aki e kliente por ta nan mes den un ambiente seif i adaptá.
Pa mas informashon òf kontakto ku FKPD meil website@FKPD.org òf yama 717 6292.