Sjaloom Zorg i FKPD (Fundashon Kuido pa Personanan Desabilitá) ta bai kuminsá traha huntu pa mehorá kuido pa personanan desabilitá. Pa logra esaki, nan a firma un kontrakt riba djabièrnè. Huntu nan tin e deseo pa mehorá e kuido i pensa riba ideanan nobo.
FKPD ta responsabel pa kuido di personanan desabilitá na Boneiru i nan a pidi asistensia di Sjaloom Zorg. Sjaloom Zorg lo duna konseho riba diferente aspekto, manera kon por sigui duna bon kuido i kon por asegurá ku personal por ehekutá nan trabou bon. “Kon bon ta pa mustra otro kon nos ta traha i asina siña di otro! Nos a wak mas leu ku e frontera di nos mes organisashonnan (i Hulanda Oropeo) pa enkontrá i reforsá otro. Ku hopi diferenshanan (kultural), pero ku un mision i vishon: pa laga personanan desabilitá biba su mes bida mas independiente posibel”, asina Keimpe Bak, direktor di Sjaloom Zorg, a reakshoná.
E lokual ku nan lo hasi huntu
Sjaloom Zorg i FKPD lo traha huntu pa mehorá kuido a base di e siguiente metanan:
- Asegurá ku e kuido ta bon i ta keda bon: Nan kier asigurá ku hende ta risibí bon kuido na midí.
- Chek si tur kos ta bon: Nan lo kontrolá si tur kos ta bon den e kuido.
- Pensa riba futuro: Nan lo pensa kiko nan por hasi pa mehorá kuido den futuro.
- Uso di teknologia nobo: Nan lo pensa kon teknologia nobo por yuda den kuido.
- Asegurá ku tur hende por partisipá: Nan ke pa tur hende, tambe personanan desabilitá, por partisipá den komunidat.
Planifikashon i plaka
FKPD i Sjaloom Zorg lo traha un plan pa nan kooperashon durante promé tres lunanan di 2024. Nan lo manda e plan aki pa esnan ku ta disidí tokante kuido, kual ta e Ministerio di Salubridat, Bienestar i Deporte (VWS). Si nan aprobá e plan, lo inkorporá esaki den e kontrakt ku gobièrnu tin ku e dos instansha di kuido aki. Dor di traha huntu, FKPD i Sjaloom Zorg tin e meta pa asigurá ku tur personanan desabilitá por tin un bida agradabel i ku e kuido ta bira mihó.
(Riba portrèt, L-R) direktonan Keimpe Bak (Sjaloom Zorg), Edilse Goeloe (FKPD) i direktòr di asuntunan internashonal di VWS Herbert Barnard.
#kuidopapersonanandesabilita #trahahuntu