Oferta di kuido
Por dividí nos oferta di kuido den tres kategoria. Nos tin e asina yamá Arbeidstraining en Vorming, ATV, esta Entrenamentu pa labor i formashon. Tin tambe e asina yamá Gezinsvervangende Tehuizen, (GTV), Institushon ku ta remplasá kas di famia. Entrenamentu pa biba na kas i biba bou di guia. Por último tin akohida den dia, Pasadia, pa mucha i adulto, akohida pa grandinan, i akohida pa mucha despues di skol.
Ta deskribí e oferta segun kada parti.
Gezinsvervangend Tehuis (GVT), Kas pa remplasá kas di famia
E provishonnan biba bou di guia, I entrenamentu pa biba den kas, ta kai bou di Gezinsvervangend Tehuis (GVT) esta Institushon pa remplasá kas di famia. Meta di entrenamentu pa biba na kas ta pa kliente ora nan ta kla pa esei, bai biba den un kas den bario. Ei nan por biba riba nan mes bou di guia.
E entrenamentu pa biba na kas i biba bou di guia, ta pa adulto hóben di 25-32 aña di edat ku tin un desabilidat serebral leve. Kliente tin un IQ entre 50 i 70. Na entrenamentu pa biba, e énfasis ta riba e kapasidat pa bo yuda bo mes. Hòmber i muhé di entrenamentu pa biba na kas i biba bou di guia, ta keda na kas apart.
Pasadia Playa
E pasadia ta brinda akohida na diferente grupo. Por ehèmpel na mucha entre 4-16 aña di edat, tin akohida pa mucha despues di skol tambe. Tin tambe akohida den dia pa adulto i akohida pa grandinan. Tin biaha mayornan ta haña ku ta duru pa manda nan yu akohida. E mamanan en partikular ta haña duru pa lòs nan mes di e yu i laga e bai. Pero ku tempu nan ta realisá nan mes ku kuido ta bira mas pisá segun ku e yu ta bira mas grandi. I ku FKPD ku su provishonnan i kuido profeshonal ku e ta brinda, ta e lugá apropiá pa nan yu.
“E reto ta sinta den loke bo por siña un kliente ku limitashon. Pa bo wak mas leu di e limitashonnan i wak si tin kos ku bo por siña e kliente. Nos tin aki un hóben ku limitashon serio. E kliente akí tabata dependé masha di nos. Nos a logra pa siña e kliente pa e mes usa kuchara ora di kome. Nos a entrená paso a paso henter e akshon di tene tayó, kohe kuminda ku kuchara, hiba kuminda boka. Djawó pa dilanti e hóben akí por kome sin nos ayudo,” asina Maideline ta konta.
Komersial
Nos klientenan i dunadó di trabou
Nos gusta pa nos klientenan ku ta bin na remarke, por hasi trabou adaptá pafó di FKPD. Nos ta konsiente ku dunadó di trabou tin prehuisio ku si nan traha ku nos klientenan, esaki ta eksigí masha di nan. I ku e bentahanan ta masha poko. Na FKPD nos ta kere den un sosiedat inklusivo kaminda tin espasio pa trabou adaptá pa nos klientenan. Nos ta mira mas tantu e bentahanan pa dunadó di trabou i kliente.
Un dunadó di trabou serka ken un kliente ta hasi trabou adaptá, ta demostrá ku e tin un kompromiso sosial i ku e ta asumí su responsabilidat. E dunadó di trabou por asta sirbi komo ehèmpel pa otro dunadó di trabou ku ta duda si ta un bon idea pa traha huntu ku FKPD. Nos klientenan ta eksperensiá ku ta tuma nan na serio i ku ta apresiá nan trabou.
Den kaso di trabou adaptá ta trata di djòp ku kliente por hasi. Un kliente di nos ta yena rèki na un supermerkado grandi. I tin kliente ku ta traha na asilo di bestia. Promé ku un kliente bai traha pa un dunadó di trabou, ta importante pa dunadó di trabou i FKPD palabrá bon kla ku otro kiko ta kontenido di e trabou, kondishonnan di trabou i guia na trabou. Tur esaki ta pa sòru ku kliente ta bai trabou kontentu tur dia.
Dunadó di trabou ku ke mas informashon tokante koperashon ku FKPD, por tuma kontakto ku nos via number 717 6292 òf meil website@FKPD.org.
Arbeidstraining en Vorming (ATV) Entrenamentu pa labor i formashon
Mas o ménos 40 hende di 18 aña bai ariba na FKPD ta hasi trabou adaptá, serka nos esei yama Arbeidstraining en Vorming (ATV), Entrenamentu laboral i formashon. Klientenan ta bai Rincon pa esaki. Un parti di nan ta bai kas despues di trabou, sobrá ta biba na FKPD. Na Rincon kliente por traha na labanderia, nan ta laba paña pa entre otro klup di bala Real Rincon, i ta laba paña di personal di FKPD. Mantenshon di kurá i hardin, tambe ta kai bou di ATV, klientenan ta hasi mantenshon na kurá i hardin di sentro di bario Amboina i sentro di bario Nort’i Saliña. Den pasado klientenan a traha bela i habon tambe, pero awor produkshon di esei a para. Tin plan pa bolbe bai traha bela i habon den futuro. Klientenan ta yuda den kushina na Rincon ora mester traha snèk pa e happy hour ku nan ta kustumbrá di tene djabièrnè atardi.
Kas pa grandinan
E kas pa grandinan ta pa hende di edat ku mester di kuido intensivo di enfermera. Esaki tin di aber ku nan limitashonnan i situashon médiko. Klientenan ta nan kama òf den ròlstul. Algun di nan ta usa un slan pa kome kuminda líkido, otro ta usa bòter di oksígeno. Tin 10 persona bibá na e kas, tin un kamber pa mucha tambe kaminda tres mucha ta haña kuido intensivo.
E klientenan no por ekspresá ku palabra si algu falta nan I nan ta dependé kompletamente di dunadó di kuido. P’esei e dunadónan di kuido ta tira bista èkstra riba nan, pa sa si tin algu. Pa e klientenan akí kontakto físiko i un trato amoroso ta masha importante. Kliente ku ta intrankil ta trankilisá si dunadó di kuido duna nan un brasa.
“E klientenan den e grupo akí ta masha kontentu ku e atenshon ku bo duna nan. Nan ta kontentu ora nan baña. Òf ora bo kuida nan i nan ta limpi atrobe i ta hole dushi. Tur biaha ku mi eksperensiá esei, mi mes tambe ta bira kontentu. Pasó mi a logra mi meta, esta ku nan ta sinti nan mes bon Ora mi kuminsá ku mi warda semper mi ta kana pasa serka e klientenan. Mi ta duna esun un sunchi, òf ta pasa man den kabei di un otro. Mi ta masha alerta kon nan ta reakshoná. Hopi biaha hende ta bisa ku nos trabou ta masha pisá. Pero pa mi ta mi vokashon. Mi stima mi klientenan di bèrdè,” Dinaida ta bisa ku chispa den su wowonan.