Ken nos ta?
Mas ku 40 aña pasá na Rincon mamanan di yu ku desabilidat serebral i òf físiko tabata preokupá pa nan bienestar. Den e tempu ei Boneiru no tabatin provishon ainda pa e grupo akí. Riba inisiativa di Ines Pourier-Wout, ku tambe tabatin un yu ku desabilidat, e mamanan tabata bin huntu. Na kas di Pourier-Wout , e mamanan Mada Janga, Marie Martijn, Doya Piar, Rugia Frans, Aramida Evertsz i Sonia Janga tabata papia di situashon di nan yunan i e kuido ku nan tabatin mester. Grásias na esfuerso i dedikashon di e mamanan akí, akohida “Pasadia Kariño’ a bira realidat. I a funda Fundashon Kuido pa Personanan Desabilitá, (FKPD) na 1979.
FKPD ta para pa kuido na midí na nos klientenan. Nos ta brinda nan un neishi kaluroso kaminda ta trata nan ku rèspèt i amor. Serka nos kliente por ta nan mes den un ambiente seif, adaptá. Kaminda tin regla i regularidat. I serka nos, nan por desaroyá nan mes segun nan posibilidatnan. Algun di nos klientenan ta hasi trabou adaptá pafó, miéntras ku otronan ta na akohida den dia i/òf ta biba serka nos.
Nos personal ta traha ku amor. Hopi di nos klientenan tin un laso kaluroso ku nan. Esaki ta hasi nos orguyoso, agradesido i kontentu. Pasó al final di dia, loke ta konta pa nos ta bienestar i felisidat di nos klientenan. Ku meskos ku e pioneronan di mas ku 40 aña pasá, nos hasi nos esfuerso pa duna nos klientenan e mihó kuido posibel.
Kiko nos ta hasi?
Nos ta brinda kuido na midí na persona ku desabilidat serebral i/òf físiko. Na FKPD nos tin di aber ku diferente tipo di kliente. Nos tin por ehèmpel kliente ku kapasidat serebral di un mucha di 18 luna, miéntras ku otro kliente tin un limitashon serebral leve. Tin kliente tambe ku limitashon físiko severo.
Kada kliente ta reta nos pa ofresé kuido na midí i si por kumpli ku su deseo. Tin biaha ta trata di deseo ku pa hende ku no konosé e situashon, ta parse algu ku n’ tin nada aden. Pero pa nos kliente e ta hasi un diferensia enorme. I p’esei nan ta masha kontentu si nan deseo bira realidat. Tuma por ehèmpel e kaso di un kliente ku tabatin mag di kome solamente kuminda machiká. Esaki tabata pasobra e persona tabatin problema ku gulimentu. E kliente a insistí pa kome galiña hasá di KFC, pero esei no tabata por relashoná ku e problema ku gulimentu.
A papia tokante deseo di e kliente den e tim di dunadó di kuido. A skohe e ora ei pa buska galiña hasá di KFC, i mustra e kliente esei. A pone e galiña den blender despues di a saka tur wesu di dje i a machik’é fini fini. Kliente a sabori’é.
Esaki tambe nos ta hasi…
Nos ta ofresé un skala di aktividat leuk na nos klientenan. Nos punto di salida ta pa kliente partisipá na aktividatnan den mundu afó .Di e oferta grandi nos ta menshoná algun aktividat : Den pasado un grupo di kliente a bai di vakashon na nos mes isla. Huntu ku par di guia nan a bai keda par di dia na hotèl. Algun kliente tabata presente na un konsierto di nan banda stimá Gio. Na Mèntòr, klientenan a tene un piknik komo parti di un dia ku muzik di reggae. Nos klientenan tabata presente na Tour de Breezy i ta presente na nos lugá fiho na Playa ora Marcha Grandi ta pasa bai.
Publikashon
Riba e página akí nos ta pone dokumento importante ku tin di aber ku e organisashon. Manera rapòrt di inspekshon.
Klek aki pa lesa e dokumentonan.
Registrá na FKPD
Mayor òf tutor ku ke registrá un persona na FKPD, por tuma kontakto ku nos via nos number di telefòn 717 6292. E ora ei nan por traha un sita pa e di promé kombersashon ku FKPD. Por manda un meil tambe na website@FKPD.org.